ಗುಂಡಿಯದ್ದೆ ಗಂಡಾಗುಂಡಿ

ಸೋಮವಾರಪೇಟೆ/ ಶನಿವಾರಸಂತೆ: ಸೋಮವಾರಪೇಟೆ ತಾಲೂಕಿನ ಗ್ರಾಮೀಣ ಭಾಗದ ರಸ್ತೆಗಳಿಗೆ ರೂಪವೂ ಇಲ್ಲ, ರೇಷೆಯೂ ಇಲ್ಲ. ಕೆಲ ವರ್ಷಗಳ ಹಿಂದೆ ಈ ಭಾಗದ ರಸ್ತೆಗಳು ಸುಸ್ಥಿತಿಯಲ್ಲಿದ್ದು, ಜಿಲ್ಲೆಯ ಇತರೆಡೆಯವರು `ಇದ್ದರೆ, ಸೋಮವಾರಪೇಟೆ ತಾಲೂಕಿನ ರಸ್ತೆಯಂತಿರಬೇಕು' ಎನ್ನುತ್ತಿದ್ದರು. ಇಂದು ಆ ಭಾಗದವರೇ ಪರಿತಪಿಸುತ್ತಿದ್ದಾರೆ. ರಸ್ತೆಗಳಲ್ಲಿ ಗುಂಡಿ ಇರುವುದರಲ್ಲಿ ವಿಶೇಷ ಅಲ್ಲ. ಆದರೆ, ಈ ತಾಲೂಕಿನ ಗ್ರಾಮೀಣ ಭಾಗದಲ್ಲಿ ಗುಂಡಿಯಲ್ಲಿ ರಸ್ತೆ ಇದೇ ಅನ್ನುವುದೇ ವಿಶೇಷ. ದುಸ್ಥಿತಿಗೆ ಹೊಂದಿಕೊಳ್ಳುವಂಥ ಅನಿವಾರ್‍ಯತೆ ಜನರದ್ದು. ಮಳೆಗಾಲದಲ್ಲಿ ರಸ್ತೆಗೆ ತೇಪೆ ಹಚ್ಚುವುದು, ರಸ್ತೆಗೆ ಬಿಡುಗಡೆಯಾದ ಹಣ ಹಂಚಿಕೊಳ್ಳುವುದು, ಚರಂಡಿ ವ್ಯವಸ್ಥೆ ಇಲ್ಲದಿರುವುದು ರಸ್ತೆಗಳ ಹಾಳುಕೊಂಪೆಗೆ ಕಾರಣ. ರಸ್ತೆ ಬದಿಯ ತೋಟದ ಮಾಲೀಕರು ಮರದ ರೆಂಬೆಗಳನ್ನು ಕಡಿಯದ್ದರಿಂದ ನೀರು ರಸ್ತೆ ಮೇಲೆ ಬಿದ್ದು, ರಸ್ತೆ ಹಾಳಾಗಲು ಕೊಡುಗೆ ನೀಡುತ್ತಿದೆ. ಸೋಮವಾರಪೇಟೆ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯ ರಸ್ತೆಗಳು ಸ್ವಲ್ಪ ಪರವಾಗಿಲ್ಲ ಎನ್ನೋದೇ ಸಮಾಧಾನ. ಎರಡು ತಿಂಗಳ ಹಿಂದೆಯಷ್ಟೇ ಪಟ್ಟಣ ವ್ಯಾಪ್ತಿಯ ರಸ್ತೆಗಳನ್ನು ಅಭಿವೃದ್ಧಿಪಡಿಸಿರುವುದರಿಂದ ಇಲ್ಲಿನ ಜನ ಬಚಾವು.