ವಿಕ ವಿಶೇಷ ಮೈಸೂರು
ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾನಿಲಯ (ಕೆಎಸ್‌ಒಯು)ಪ್ರಸಕ್ತ ಶೈಕ್ಷಣಿಕ ವರ್ಷ ದಿಂದ ಆನ್‌ಲೈನ್ ಮೂಲಕ ಸ್ನಾತಕೋತ್ತರ ಕೋರ್ಸ್ ಆರಂಭಿಸಲು ನಿರ್ಧರಿಸಿದೆ.
ಉನ್ನತ ಶಿಕ್ಷಣ ವಂಚಿತರ ಮನೆ ಬಾಗಿಲಿಗೆ ಅಂಚೆ ಮೂಲಕ ‘ಶಿಕ್ಷಣ’ ತಲುಪಿಸುವ ಮಹಾನ್ ಉದ್ದೇಶದಿಂದ ೧೪ ವರ್ಷಗಳ ಹಿಂದೆ ಆರಂಭವಾದ ವಿವಿ, ಈಗ ತನ್ನ ವ್ಯಾಪ್ತಿಯ ಎಲ್ಲೆಯನ್ನು ಸಾಗರದಾಚೆಗೆ ಕೊಂಡೊಯ್ದಿದೆ. ಈ ವರ್ಷದಿಂದ ದೇಶ- ವಿದೇಶಗಳ ಯಾವುದೇ ಮೂಲೆಯಲ್ಲಿರುವ ವಿದ್ಯಾರ್ಥಿಗಳು, ತಾವು ಕುಳಿತಲ್ಲಿಂದಲೇ ವಿವಿ ನೀಡುವ ಸ್ನಾತಕೋತ್ತರ ಕೋರ್ಸ್‌ಗಳನ್ನು ಕಲಿತು, ಪದವಿ ಪಡೆಯ ಬಹುದು. ಮುಕ್ತ ವಿವಿ ಇನ್ಮುಂದೆ ದೂರ ಶಿಕ್ಷಣದ ಜತೆಗೆ ಆನ್‌ಲೈನ್ ಮೂಲಕವೂ ಶಿಕ್ಷಣ ಕಲಿ ಸುವ ಹೊಸ ಹೊಣೆಯನ್ನು ಹೊರಲಿದೆ. ಈ ನೆಲೆ ಯಲ್ಲಿ- ಮೈಸೂರು ಕೇಂದ್ರಿತ ಮುಕ್ತ ವಿವಿ ಈಗ ಜಾಗತಿಕ ವಿದ್ಯಾರ್ಥಿ ವೃಂದವನ್ನು ಸೆಳೆ ಯಲು ಶಕ್ತವಾಗಿರುವ ಅಂತಾರಾಷ್ಟ್ರೀಯ ವಿವಿಯೂ ಹೌದು !
‘೨೦೧೦-೧೧ನೇ ಸಾಲಿನಿಂದಲೇ ಎಂಬಿಎ (ಮಾಸ್ಟರ್ ಆಫ್ ಬ್ಯುಸಿನೆಸ್ ಅಡ್ಮಿನೇಸ್ಟ್ರೇಷನ್) ಕೋರ್ಸ್ ಅನ್ನು ಅನ್ ಲೈನ್ ಮೂಲಕ ವಿವಿ ನೀಡಲಿದೆ. ಜುಲೈ ನಿಂದ ವಿದ್ಯಾರ್ಥಿಗಳ ದಾಖಲೆಯೂ ಆರಂಭವಾಗಲಿದೆ’ ಎಂದು ಮುಕ್ತ ವಿವಿ ಕುಲಪತಿ ಡಾ. ಕೆ. ಎಸ್. ರಂಗಪ್ಪ ವಿಜಯ ಕರ್ನಾಟಕಕ್ಕೆ ತಿಳಿಸಿದರು.
‘ಆನ್‌ಲೈನ್ ಕೋರ್ಸ್ ವಿವಿಗೆ ಹೊಸದಾದರೂ, ಅದರ ಕಾರ್ಯವೈಖರಿ ಹೊಸದೇನಲ್ಲ. ನಾವು ನೀಡುತ್ತಿರುವ ಪದವಿ, ಸ್ನಾತಕೋತ್ತರ ಪದವಿ ಮತ್ತು ವಿವಿಧ ಡಿಪ್ಲೊಮಾ, ಸರ್ಟಿಫಿಕೇಟ್ ಕೋರ್ಸ್‌ಗಳ ಪಠ್ಯ ಹಾಗೂ ಸಾಮಗ್ರಿಗಳನ್ನು ರಚಿಸುವಲ್ಲಿ ಮಾಹಿತಿ ತಂತ್ರಜ್ಞಾನವನ್ನು ದುಡಿಸಿಕೊಳ್ಳು ತ್ತಿದ್ದೇವೆ. ಕೇವಲ ಲಿಪಿ ಆಧರಿತ ಶಿಕ್ಷಣ ಸಾಮಗ್ರಿಗಳನ್ನು ಅವಲಂಬಿಸದೇ, ದೃಶ್ಯ ಹಾಗೂ ಶ್ರವ್ಯ ಕಲಿಕಾ ಸಾಮಗ್ರಿಗಳನ್ನು ಬಳಸುತ್ತಿದ್ದೇವೆ. ಜ್ಞಾನವಾಣಿ ವಾಹಿನಿಗಳ ಮೂಲಕವೂ ಶಿಕ್ಷಣ ಬೋಧಿಸುತ್ತಿದ್ದೇವೆ. ಆನ್‌ಲೈನ್ ಶಿಕ್ಷಣ ನೀಡುವಿಕೆ, ನಮ್ಮ ಈ ಕಾರ್ಯ ವಿಧಾನದ ಮುಂದುವರಿದ ಭಾಗವಷ್ಟೆ’ ಎಂದು ಹೇಳಿದರು.
‘ಆನ್‌ಲೈನ್ ಶಿಕ್ಷಣ ನೀಡಿಕೆಯಲ್ಲಿ ಅನುಭವ ಹೊಂದಿ ರುವ ಪರಿಣತ ಸಂಸ್ಥೆ ಹಾಗೂ ತಜ್ಞ ಅಧ್ಯಾಪಕರ ನೆರವು ಪಡೆದು ಕೋರ್ಸ್ ಪ್ರಾರಂಭಿಸುತ್ತೇವೆ. ನಮ್ಮಲ್ಲಿ ಪೂರ್ಣ ಪ್ರಮಾಣದ ಬೋಧನಾ ಸಿಬ್ಬಂದಿ ತಯಾರಾಗುವವರೆಗೆ, ಈ ಸೇವೆಯನ್ನು ಹೊರ ಗುತ್ತಿಗೆ ಆಧಾರದ ಮೇಲೆ ಪಡೆಯಲಾಗುವುದು. ವಿದ್ಯಾರ್ಥಿಗಳ ನೋಂದಣಿ, ಈ- ಕಲಿಕೆ ಸೇರಿದಂತೆ ಎಲ್ಲವೂ ಆನ್‌ಲೈನ್ ಆಗಲಿದೆ. ಇಂದಿರಾಗಾಂಧಿ ರಾಷ್ಟ್ರೀಯ ಮುಕ್ತ ವಿಶ್ವವಿದ್ಯಾನಿಲಯದ ಆನ್‌ಲೈನ್ ಕೋರ್ಸ್‌ಗಳ ಮಾದರಿಯಲ್ಲೇ, ಎಂಬಿಎ ಕೋರ್ಸ್ ರೂಪಿಸಿದ್ದೇವೆ’ ಎಂದು ವಿವರಿಸಿದರು.
ಆನ್‌ಲೈನ್ ಎಂಬಿಎ ಏಕೆ
ಆನ್‌ಲೈನ್ ಮೂಲಕ ಪದವಿ ಪಡೆಯಲು ಬಯಸುವವರು ಸಾಮಾನ್ಯವಾಗಿ ಯಾವುದಾದರೊಂದು ಕ್ಷೇತ್ರದಲ್ಲಿ ಕಾರ್ಯನಿರತ ಉನ್ನತ ಪದವೀಧರರೇ ಆಗಿರುತ್ತಾರೆ. ತಮ್ಮ ವೃತ್ತಿಯಲ್ಲಿ ಇನ್ನಷ್ಟು ಏಳ್ಗೆ ಹೊಂದಲು ಅವರಿಗೆ ಎಂಬಿಎ ಪದವಿ ಬೇಕಿರುತ್ತದೆ ಎಂಬುದು ಕೆಲವು ಸಮೀಕ್ಷೆಗಳಿಂದಲೂ ದೃಢಪಟ್ಟಿದೆ. ಇದಲ್ಲದೆ, ಎಂಬಿಎ ಪದವೀಧರರಿಗೆ ಮಾತ್ರ ವಿವಿಧ ಕ್ಷೇತ್ರಗಳಲ್ಲಿ ಉದ್ಯೋಗವಕಾಶ ಹೆಚ್ಚಿದೆ. ಹಾಗಾಗಿ ವಿವಿ ಮೊದಲ ವರ್ಷ ಎಂಬಿಎ ಕೋರ್ಸ್ ಆರಂಭಿಸುತ್ತಿದೆ ಎಂಬುದು ರಂಗಪ್ಪ ನೀಡುವ ವಿವರಣೆ. ಇದರ ಯಶಸ್ಸನ್ನು ಗಮನಿಸಿ ಮುಂಬರುವ ವರ್ಷಗಳಲ್ಲಿ ಬೇರೆ-ಬೇರೆ ಕೋರ್ಸ್‌ಗಳನ್ನು ಆನ್‌ಲೈನ್ ಮೂಲಕ ಪ್ರಾರಂಭಿಸಲು ಚಿಂತನೆ ನಡೆಸಲಾಗುವುದು ಎಂದರು.
ಎಂಎಸ್ಸಿ, ಎಲ್‌ಎಲ್‌ಎಂ ಶುರು
ಪ್ರಸಕ್ತ ಶೈಕ್ಷಣಿಕ ವರ್ಷದಿಂದ ಕಂಪ್ಯೂಟರ್ ಸೈನ್ಸ್, ಗಣಿತ ವಿಷಯದಲ್ಲಿ ಸ್ನಾತಕೋತ್ತರ ಪದವಿಯನ್ನು ವಿವಿ ಆರಂಭಿಸುತ್ತಿದೆ. ‘ನಾನು ಹೇಳಿ-ಕೇಳಿ ವಿಜ್ಞಾನ ಕ್ಷೇತ್ರದಿಂದ ಬಂದವನು. ಇಲ್ಲಿಗೆ ಬಂದ ಮೊದಲ ದಿನವೇ, ಭೌತಶಾಸ್ತ್ರ, ರಸಾಯನಶಾಸ್ತ್ರ ಸೇರಿದಂತೆ ಮೂಲ ವಿಜ್ಞಾನ ವಿಷಯಗಳ ಎಂಎಸ್ಸಿ ಕೋರ್ಸ್ ಆರಂಭಿಸಬೇಕೆಂಬ ಸಂಕಲ್ಪ ತೊಟ್ಟಿದ್ದೆ. ಆದರೆ, ಎಲ್ಲವೂ ಸಾಧ್ಯವಾಗುತ್ತಿಲ್ಲ. ಈ ವರ್ಷ ಎರಡು ಎಂಎಸ್ಸಿಗಳನ್ನು ಮಾತ್ರ ಆರಂಭಿಸಲಾಗುತ್ತಿದೆ. ಇದರ ಜತೆಗೆ ಕಾನೂನಿನ ವಿಷಯದಲ್ಲಿ ಸ್ನಾತಕೋತ್ತರ ಪದವಿಯನ್ನು (ಎಲ್‌ಎಲ್‌ಎಂ) ಶುರು ಮಾಡುತ್ತಿದ್ದೇವೆ . ಇದಕ್ಕಾಗಿ ಎಲ್ಲ ಶೈಕ್ಷಣಿಕ ಸಿದ್ಧತೆ ಮಾಡಿಕೊಳ್ಳಲಾಗಿದೆ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ