ನಿಜಕ್ಕೂ ಈ ಗ್ರಾಮಸ್ಥರದ್ದು ತ್ರಿಶಂಕು ಸ್ಥಿತಿ. ನಗರಸಭೆ ವ್ಯಾಪ್ತಿಗೆ ಸೇರಿದ್ದರೂ ಈ ಗ್ರಾಮ ಅತ್ತ ಹಳ್ಳಿಯೂ ಅಲ್ಲ. ಇತ್ತ ನಗರ ಪ್ರದೇಶವೂ ಅಲ್ಲ. ಗ್ರಾಮದ ಎತ್ತ ನೋಡಿದರೂ ಅನೈರ್ಮಲ್ಯ. ನಗರಸಭೆ ವ್ಯಾಪ್ತಿಯಲ್ಲಿನ ಎಲ್ಲ ಕೊಳಚೆ ನೀರು ಬಂದು ಸೇರುವುದು ಈ ಗ್ರಾಮವನ್ನೆ !
ಹೌದು, ಇದು ನಗರಸಭೆ ವ್ಯಾಪ್ತಿಯ ಮೋಳೆ ಗ್ರಾಮದ ದುಃಸ್ಥಿತಿ. ಸದಾ ಕೊಳಚೆಯಲ್ಲೇ ಇರುವ ಇಲ್ಲಿನ ಜನತೆಯ ಬದುಕು ಮೂರಾಬಟ್ಟೆ. ನಗರಸಭೆ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ಆಡಳಿತ ವೈಖರಿಗೆ ಈ ಗ್ರಾಮ ಕೈಗನ್ನಡಿ. ಈ ಹಿಂದೆ ಪುರಸಭೆಯಾಗಿ ಮೇಲ್ದರ್ಜೆ ಗೇರಿಸುವ ಸಂದರ್ಭದಲ್ಲಿ ಈ ಮೋಳೆ ಗ್ರಾಮವನ್ನು ಪಟ್ಟಣದ ವ್ಯಾಪ್ತಿಗೆ ಸೇರಿಸಲಾಯಿತು. ಪುರಸಭೆ ಆಡಳಿತ ದಲ್ಲಂತೂ ಗ್ರಾಮಕ್ಕೆ ಕಾಯಕಲ್ಪ ದೊರೆಯ ಲಿಲ್ಲ. ನಗರಸಭೆಯಾದ ನಂತರವಾದರೂ ಮೋಳೆ ಅಭಿವೃದ್ಧಿ ಯತ್ತ ಮುಖ ಮಾಡುತ್ತದೆ ಎಂಬ ನಿರೀಕ್ಷೆ ಹುಸಿಯಾಗಿದೆ. ಸಮಸ್ಯೆ ದಿನದಿಂದ ದಿನಕ್ಕೆ ಉಲ್ಬಣಿಸುತ್ತಿದೆ.
ಅಭಿವೃದ್ಧಿ ದೂರವೇ ದೂರ: ೧೯೯೩ರಲ್ಲಿ ಗ್ರಾಮದ ಬಡ ಜನರಿಗೆ ಆಶ್ರಯ ಯೋಜನೆಯಡಿ ೬೮ ನಿವೇಶನಗಳನ್ನು ನೀಡ ಲಾಗಿದೆ. ಅದನ್ನು ಹೊರತು ಪಡಿಸಿ ದರೆ ಮೂಲ ಸೌಲಭ್ಯ ಎಂಬುದು ಮರೀಚಿಕೆ. ಸುಮಾರು ೨೫೦೦ ರಷ್ಟು ಜನಸಂಖ್ಯೆ ಇರುವ ಈ ಗ್ರಾಮದಲ್ಲಿರುವ ಎಲ್ಲರೂ ಹಿಂದುಳಿದ ವರ್ಗದ ಉಪ್ಪಾರರು. ಜೀವನಾಧಾರಕ್ಕೆ ಹೂವು, ಸೊಪ್ಪು, ತರಕಾರಿ ಮಾರುವುದು, ಗಾರೆ ಕೆಲಸ ಇವರ ನಿತ್ಯ ಕಸುಬು. ಇಂಥ ಕಷ್ಟ ಜೀವಿಗಳು ವಾಸಿಸುವ ಈ ಪ್ರದೇಶಕ್ಕೆ ಕನಿಷ್ಠ ಮೂಲ ಸೌಲಭ್ಯ ವನ್ನು ಒದಗಿಸುವಲ್ಲಿ ನಗರಸಭೆ ವಿಫಲವಾಗಿದೆ.
ಗ್ರಾಮದಲ್ಲಿ ಕೊಳಚೆ ನೀರು ಬಂದು ನಿಲ್ಲುವುದರಿಂದ ಇಡೀ ವಾತಾವರಣ ಹದಗೆಡುತ್ತಿದೆ. ಗ್ರಾಮಕ್ಕೆ ಪ್ರವೇಶಿಸುತ್ತಿದ್ದಂತೆ ದುರ್ಗಂಧ ಸ್ವಾಗತಿಸುತ್ತದೆ. ಸಮಸ್ಯೆ ಇಷ್ಟೇ ಇದ್ದರೆ ತೊಂದರೆ ಇರುತ್ತಿರಲಿಲ್ಲ. ಇಲ್ಲಿ ಶೌಚಾಲಯದ ಉದ್ದೇಶಕ್ಕೆ ಗ್ರಾಮದ ಯಾವ ಮೂಲೆಯಲ್ಲೂ ಹಳ್ಳ ತೆಗೆಯುವಂತಿಲ್ಲ. ಒಂದು ವೇಳೆ ತೆಗೆದರೂ ಪ್ರಯೋಜನವಾಗುವುದಿಲ್ಲ. ಮೂರೂವರೆ ಅಡಿ ಉದ್ದಕ್ಕೆ ಹಳ್ಳ ತೆಗೆದರೆ ಕೊಳಚೆ ನೀರು ತುಂಬಿಕೊಳ್ಳುತ್ತದೆ.
ಗ್ರಾಮದಲ್ಲಿ ಕೊಳಚೆ ನೀರು ಅಂತರ್ಜಲದ ರೀತಿಯಲ್ಲಿ ಆವರಿಸಿಕೊಳ್ಳುತ್ತಿದೆ. ಸುಮಾರು ೨೦ ವರ್ಷಗಳಿಂದ ಗ್ರಾಮದ ಸುತ್ತಲೂ ಕೊಳಚೆ ನೀರು ನಿಲ್ಲುತ್ತಿರುವುದರಿಂದ ಇಡೀ ಪ್ರದೇಶ ದಲ್ಲಿ ಆ ನೀರೇ ಆವರಿಸಿಕೊಂಡಿದೆ. ಇದು ಹೀಗೆ ಮುಂದು ವರಿದರೆ ಕೊಳವೆಬಾವಿ ಯಲ್ಲೂ ಕೊಳಚೆ ನೀರು ಬರುವುದರಲ್ಲಿ ಅನುಮಾನವಿಲ್ಲ.
ಇತ್ತ ಯಾರ ಲಕ್ಷ್ಯವೂ ಇಲ್ಲ: ನಗರಸಭೆಯ ಇತರೆ ಬಡಾ ವಣೆಗಳಿಗೆ ಸಿಗುವ ಸೌಲಭ್ಯ ಇತ್ತ ಬರುತ್ತಿಲ್ಲ. ಈ ಬಡಾವಣೆ ಯನ್ನು ನಗರಸಭೆ ಹಾಗೂ ಇತರೆ ಜನಪ್ರತಿನಿಧಿಗಳು ಕಡೆಗಣಿಸಿ ದ್ದಾರೆ ಎಂಬುದಕ್ಕೆ ಇದಕ್ಕಿಂತ ನಿದರ್ಶನ ಬೇಕಿಲ್ಲ. ಕಾವೇರಿ ಕುಡಿ ಯುವ ನೀರಿನ ಪೂರೈಕೆ ಇದೆಯಾದರೂ ಸಮರ್ಪಕವಾಗಿಲ್ಲ. ಪೈಪ್‌ಲೈನ್ ಅವ್ಯವಸ್ಥೆಯಿಂದಾಗಿ ಮೋಳೆ ಗ್ರಾಮಸ್ಥರು ಕಾವೇರಿಯನ್ನು ಅಗತ್ಯಕ್ಕನುಸಾರ ಬಳಸಲು ಸಾಧ್ಯವಾಗುತ್ತಿಲ್ಲ.
ರಸ್ತೆಗಳು ಡಾಂಬರು ಇರಲಿ, ಮೆಟ್ಲಿಂಗ್‌ಅನ್ನೂ ಕಂಡಿಲ್ಲ. ಇನ್ನು ಚರಂಡಿ ವ್ಯವಸ್ಥೆ ಕನಸಿನ ಮಾತು. ಚರಂಡಿ ವ್ಯವಸ್ಥೆ ಇಲ್ಲವಾದ್ದರಿಂದ ಓಡಾಡುವ ರಸ್ತೆಗಳ ಮಧ್ಯದಲ್ಲೇ ಕೊಳಚೆ ನೀರು ನಿಂತಿರುತ್ತದೆ. ಇಂಥ ಅವ್ಯವಸ್ಥೆಯ ನಡುವೆಯೂ ಇಲ್ಲಿನ ಜನ ವಾಸವಾಗಿದ್ದಾರೆ ಎಂಬುದೇ ಅಚ್ಚರಿ ಸಂಗತಿ. ಎಲ್ಲೆಂದರಲ್ಲಿ ತಿಪ್ಪೆ ಗುಂಡಿ, ಕೊಳಚೆಮಯ ವಾತಾವರಣದಿಂದಾಗಿ ಗ್ರಾಮ ದಲ್ಲಿ ಆಗಾಗ ಸಾಂಕ್ರಾಮಿಕ ರೋಗಗಳು ಕಾಣಿಸಿಕೊಳ್ಳುತ್ತಲೇ ಇರುತ್ತವೆ. ಈ ಹಿಂದೆ ಪುರಸಭೆ ಆಡಳಿತವಿದ್ದಾಗ ಸೊಳ್ಳೆಗಳನ್ನು ನಾಶ ಪಡಿಸುವ ಸಲುವಾಗಿ ಫಾಗಿಂಗ್ ಯಂತ್ರವನ್ನು ಖರೀದಿಸಲಾಗಿತ್ತು. ಅದನ್ನು ಉದ್ಘಾಟಿಸಿದ್ದನ್ನು ಬಿಟ್ಟರೆ ಅದನ್ನು ಮತ್ಯಾವ ಸಂದರ್ಭದಲ್ಲೂ ಬಳಸಿಲ್ಲ.
ಒಟ್ಟಾರೆ ಪಟ್ಟಣದಿಂದ ಕೂಗಳತೆ ದೂರದಲ್ಲಿರುವ ಮೋಳೆ ಗ್ರಾಮಸ್ಥರ ಸ್ಥಿತಿ ಚಿಂತಾಜನಕವಾಗಿದೆ. ಕಷ್ಟದ ಜೀವಿಗಳನ್ನು ನಗರಸಭೆ ನಿಕೃಷ್ಟವಾಗಿ ಕಾಣುತ್ತಿದೆ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ