ಮಾವು ಹೂವು ಕಾಯಿ ಮಯ

ವಿಕ ವಿಶೇಷ  ಮೈಸೂರು
ಹಣ್ಣುಗಳ ರಾಜ ಮಾವು ಈ ವರ್ಷ ಸಮೃದ್ಧವಾಗಿ ಪಲ್ಲವಿಸಿದೆ. ಮಾವಿನ ತೋಪುಗಳನ್ನು ನಳ ನಳಿಸುವಂತೆ ಮಾಡಿದ್ದ ಹೂವಿಗೆ ಈಗ ಕಾಯಿ ಕಟ್ಟುವ  ಸಂಭ್ರಮ.
ಕಳೆದ ಹಿಂಗಾರು ದೀರ್ಘ ವಾಗಿದ್ದರಿಂದ  ಈ ಬಾರಿ ಹೂವಾಗುವುದು ಸ್ವಲ್ಪ ತಡ ವಾಗಿದ್ದರೂ ಬಂಪರ್ ಫಸಲು ನಿರೀಕ್ಷಿತ. ಬೆಳೆಗಾರರ ಪರಿಭಾಷೆ ಯಲ್ಲಿದು `ಆನ್ ಇಯರ್'.
ಮರುಕಳಿಸಿದರೆ:ಆದರೆ,ಕಳೆದೆರಡು ದಿನದ ಹಿಂದೆ ಅಲಲ್ಲಿ ಬಿದ್ದ `ಬೇಸಿಗೆ ಮಳೆ', ಮೋಡ ಕವಿದ ವಾತಾವರಣ ಮೈಸೂರು, ಮಂಡ್ಯ,ಚಾಮರಾಜನಗರ ಜಿಲ್ಲೆ ಮಾವು ರೈತರ ಮುಖದಲ್ಲಿ ದುಗುಡದ ಗೆರೆ ಮೂಡಿಸಿದೆ. ಮೊದಲ ಮಳೆಯಿಂದ ಹೆಚ್ಚೇನು ತೊಂದರೆ ಆಗಿಲ್ಲ.ಮರುಕಳಿಸಿ,ಮುಂದುವರಿದರೆ ತೊಂದರೆ.

ಚೇಸಿಂಗ್ ಕ್ರೇಜ್ ಅಪಾಯಕ್ಕೆ ರಹದಾರಿ

ಯುವ ಜನತ ವೀಲಿಂಗ್ ಹಾಗೂ ಚೇಸಿಂಗ್ ಕ್ರೇಜ್‌ಗೆ ಬಹುಪಾಲು ಸಿನಿಮಾಗಳ ಪ್ರಭಾವವೇ ಕಾರಣ. ಬಿಸಿರಕ್ತದ ಹುಮ್ಮಸ್ಸಿನಿಂದ ಮುಂದಿನ ಪರಿಣಾಮದ ಆಲೋಚನೆ ಇಲ್ಲದೆ ನಡೆಸುವ ಇಂಥ ಹುಚ್ಚಾಟದಿಂದ ಇತರರ ಪ್ರಾಣಕ್ಕೆ ಎರವಾಗುವುದೇ ಹೆಚ್ಚು.

ಭವಿಷ್ಯದಲ್ಲಿ ಕೊಡಗು ಬರಡು ಭೂಮಿ ?

ಅಜ್ಜಮಾಡ ರಮೇಶ್ ಕುಟ್ಟಪ್ಪ ಮಡಿಕೇರಿ
ಕೊಡಗಿನ ಅಮೂಲ್ಯ ಪರಿಸರಕ್ಕೆ ಸಂಬಂಧಿಸಿದಂತೆ ಇದು ಆತಂಕಕಾರಿ ವರದಿ. ಅರಣ್ಯ ಪ್ರದೇಶದ ಮೇಲಾಗು ತ್ತಿರುವ ಗಂಡಾಂತರದ ಮುನ್ಸೂಚನೆ. ಎಂಬತ್ತು ವರ್ಷಗಳ ಅಂತರದಲ್ಲಿ ಮಲೆನಾಡ ಕೊಡಗಿನಲ್ಲಿ ೪೨೯.೫೨ ಚದರ ಅಡಿ ಪ್ರದೇಶದಲ್ಲಿ ಅರಣ್ಯ ನಾಶ ವಾಗಿದೆ. ತಕ್ಷಣ ಎಚ್ಚೆತ್ತುಕೊಳ್ಳದಿದ್ದಲ್ಲಿ ಭವಿಷ್ಯದಲ್ಲಿ ಕೊಡಗು ತನ್ನ ಸೊಬಗನ್ನೇ ಕಳೆದು ಕೊಳ್ಳುವ ಭೀತಿ.
೧೯೩೦ ರಲ್ಲಿ ಕೊಡಗಿನ ಒಟ್ಟು ಭೂ ಪ್ರದೇಶದ ೪,೧೦೯.೨೫ ಚದರಡಿಯಲ್ಲಿ ೩,೫೩೮.೫೦ ಚದರಡಿ (ಶೇ.೮೬.೧೧) ಅರಣ್ಯ ಇತ್ತು. ೨೦೧೦ ಕ್ಕೆ ೧೦.೪೫ ಶೇಕಡ ವಾರು ಕುಸಿತ ಕಂಡಿದೆ. ಪ್ರಸ್ತುತ ೩,೧೦೮.೯೮ (ಶೇ. ೭೫.೬೬)ರಷ್ಟು ಅರಣ್ಯ ಇದೆ. ಅರಣ್ಯ ಹಾನಿ ತಡೆಗಟ್ಟ ದಿದ್ದಲ್ಲಿ ಮತ್ತಷ್ಟು ಶರವೇಗದಲ್ಲಿ ಕೊಡಗು ಬರಡಾದೀತು.

ಮೈಸೂರಿಗೆ ಬರ್ತಾಳೆ ರಾಜ್ಯರಾಣಿ

ಪಿ.ಓಂಕಾರ್ ಮೈಸೂರು
ನಾಲ್ಕೈದು ಹೊಸ,ಅನಿರೀಕ್ಷಿತ ರೈಲುಗಳ ಘೋಷಣೆ. ಮೂರು ಮಾರ್ಗಗಳ  ಸರ್ವೇ ಪ್ರಸ್ತಾಪ. ಆದರೆ,ಈ ಬಾರಿಯೂ `ಹಳಿ'ಗೆ ಬರದ ಬಹು ನಿರೀಕ್ಷೆಯ ಯೋಜನೆಗಳು. ಭರವಸೆಗಳ ಪಾಡು ಮತ್ತೊಮ್ಮೆ `ಬರೀ ರೈಲು'ಗೆ ಸೀಮಿತ...
ಕೇಂದ್ರ ರೈಲ್ವೇ ಮಂತ್ರಿ ಮಮತಾ ಬ್ಯಾನರ್ಜಿ ಶುಕ್ರವಾರ ಮಂಡಿಸಿದ ರೈಲ್ವೇ ಆಯವ್ಯಯವನ್ನು ಮೈಸೂರು ಪ್ರಾತ್ಯದ ಜನ ಹೀಗೆ ವಿಮರ್ಶಿಸಬಹುದು. ಬೆಂಗಳೂರು-ಮೈಸೂರು ಮಧ್ಯೆ ಹೊಸ ರೈಲುಗಳ ಪ್ರಕಟಣೆ ಖುಷಿಯ ಸಂಗತಿಯಾದರೂ,`ಕ್ರಾಸಿಂಗ್ ಕಾಟ'ದಿಂದ ಪ್ರಯಾಣ ಅವಧಿ ವಿಳಂಭಿಸುವ ಅಪಾಯ ಅದರ ಬೆನ್ನಿಗಿದೆ ಎನ್ನುವುದು ಗಮನಾರ್ಹ.
ಮಮತಾ ಕೊಟ್ಟದ್ದು: ಕಳೆದ ವರ್ಷದ ಘೋಷಣೆಗಳಾದ  ಮೈಸೂರು-ಮಡಿಕೇರಿ- ಮಂಗಳೂರು ಮತ್ತು ಚಾಮರಾಜನಗರ-ಕೃಷ್ಣಗಿರಿ ಮಾರ್ಗಗಳ  ಸರ್ವೆಗೇ ಇನ್ನೂ ಚಾಲನೆ ಸಿಕ್ಕಿಲ್ಲ. ಆದರೂ,ಆಗುತ್ತದೆಂದು ನಂಬಬಹುದಾದರೆ  ನಂಜನಗೂಡು-ನೀಲಂಬೂರು ರೋಡ್, ಚಾ.ನಗರ- ತುಮಕೂರು, ಮೈಸೂರು- ಗುಂಡ್ಲುಪೇಟೆ- ತಲಚೇರಿ ಹೊಸ ಮಾರ್ಗ ಸಮೀಕ್ಷೆ ಪ್ರಕಟಣೆಗಳು ಈ ಬಾರಿಯ `ಕೊಡುಗೆ 'ಗಳು.

ಕಾಳುಗಟ್ಟದ ಕಣಿವೆ ಕನಸು

ಮುಖ್ಯಮಂತ್ರಿ ಮಂಡಿಸಿದ ರಾಜ್ಯ ಆಯವ್ಯಯದಲ್ಲಿ ಕಾವೇರಿ ಕಣಿವೆಗೆ  ಹಲವು ಕೋಟಿಗಳು ಹರಿದಿರುವುದು ಸುಳ್ಳಲ್ಲ.ನಾಲ್ಕು ಜಿಲ್ಲೆಗಳ ಬಾಬ್ತಿನಲ್ಲಿ ದಕ್ಕಿದ ಕೆಲ ಯೋಜನೆಗಳು ಹಿಂದಿನವು, ಇನ್ನು ಕೆಲವು ಎಂದಿನ ವಿಸ್ತರಣೆಗಳು,ಹೊಸದರತ್ತ ನೋಟ ಬೆರಳೆಣಿಕೆಯಷ್ಟು ಮಾತ್ರ ಎನ್ನುವುದೂ ಸುಳ್ಳಲ್ಲ.ಹಿಂದಿನ  ಸತತ ಐದು ವರ್ಷದ  ಹಲವು ಬಜೆಟ್ ಘೋಷಣೆಗಳು `ಗಾಳಿಪಟ'ವಾಗಿ ರಾರಾಜಿಸಿದ್ದೂ  ಖಂಡಿತಾ ಸುಳ್ಳಲ್ಲ. ನಿಜ ! ಮೈಸೂರು ಭಾಗದ ಜನ ಕೇಳುತ್ತಿದ್ದಾರೆ...`ಹೊಸ ಕನಸು ಅರಳಿಲ್ಲ. ಆದದ್ದಾಯಿತು,ಹಳೆಯ ಭರವಸೆಗಳನ್ನಾದರೂ ಈಡೇರಿಸಿ' ಎಂದು.

ಬಜೆಟ್: ಮೈಸೂರಿನ `ಬೃಹತ್'ನಿರೀಕ್ಷೆ

ಸತತ ೬ನೇ ಬಜೆಟ್ ಮಂಡನೆಗೆ ಬಿ.ಎಸ್.ಯಡಿಯೂರಪ್ಪ ಸಜ್ಜಾ ಗಿದ್ದಾರೆ. ಉಪಮುಖ್ಯಮಂತ್ರಿ - ಹಣಕಾಸು ಸಚಿವರಾಗಿ ಎರಡು ಬಾರಿ, ಮುಖ್ಯಮಂತ್ರಿಯಾಗಿ ೩ ಬಾರಿ ಮಂಡಿಸಿದ ಬಜೆಟ್‌ನಲ್ಲಿ ಅವರು ಮೈಸೂರು ಭಾಗಕ್ಕೆ ಮೋಸವನ್ನೇನು ಮಾಡಿರಲಿಲ್ಲ. ಬೇಡಿಕೆಗೆ ಸ್ಪಂದಿಸಿದ್ದರು, ಕೆಲವು ಅಚ್ಚರಿಯ ಕೊಡುಗೆಗಳನ್ನೂ  ನೀಡಿದ್ದರು.`ಬೇರೆ ಬೇರೆ' ಕಾರಣಕ್ಕೆ ನಿರೀಕ್ಷೆ ಗಳನ್ನು ಹುಸಿಯಾಗಿಸಿದ್ದೂ ಇದೆ.
ಘೋಷಣೆಗಳ ವಿಷಯದಲ್ಲೂ ಅಷ್ಟೆ. ಕೆಲವಷ್ಟೆ ಕೈಗೂಡಿವೆ. ಕೆಲವು ಜಾರಿ ಹಂತದಲ್ಲಿವೆ.`ಬಾಕಿ' ಸಂಖ್ಯೆಯೇ ಹೆಚ್ಚಿದೆ. ಈಗ,ಇನ್ನೊಂದು `ಬಜೆಟ್ ಬುಟ್ಟಿ' ಹಿಡಿದು ನಿಂತಿದ್ದಾರೆ.`ಕೃಷಿಕರಿಗೆ ಪ್ರತ್ಯೇಕ ' ಎಂಬ ಮಾಯಾ ಅಸ್ತ್ರ ಬತ್ತಳಿಕೆಯಲ್ಲಿದೆ. `ಇದು ಚುನಾವಣಾ ಬಜೆಟ್' ಎಂದೂ ವಿಶ್ಲೇಷಿಸಲಾಗುತ್ತದೆ. ಈ ಕಾರಣಕ್ಕೆ, ಮೈಸೂರು ಜಿಲ್ಲೆ ದೊಡ್ಡ ನಿರೀಕ್ಷೆಗಳನ್ನು ಹೊಂದಿದೆ.ಹಿಂದಿನ ವರ್ಷಗಳ ಕತೆ ಏನೇ ಇರಲಿ, ರಾಜಕೀಯ ಕಾರಣಕ್ಕಾಗಿಯಾದರೂ ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ತವರಿನ  ಒಟ್ಟು ಅಭಿವೃದ್ಧಿ ದೃಷ್ಟಿಯಿಂದ  ಒಂದಷ್ಟು `ಬಂಪರ್' ಕೊಡಗೆಗಳನ್ನು ನೀಡಿಯಾರು ಎಂಬುದು ನಿರೀಕ್ಷೆಗಳ ಮೂಟೆಯನ್ನು ಉಬ್ಬಿಸಿದೆ.